మహిళా కానిస్టేబుల్ ను రేప్ చేసి వీడియో తీసిన ముంబై క్రైమ్ బ్రాంచ్ ఎస్ఐ!

నవీ ముంబై క్రైమ్ బ్రాంచ్ లో సబ్ ఇన్ స్పెక్టర్ గా పనిచేస్తున్న అమిత్ షెలార్, తనకు మత్తుమందిచ్చి, రేప్ చేయడంతో పాటు, దాన్ని వీడియో తీసి, బెదిరింపులకు దిగుతున్నాడని ఓ మహిళా కానిస్టేబుల్ ఆరోపించడంతో, పోలీసులు కేసు నమోదు చేశారు. పోలీసులు వెల్లడించిన మరిన్ని వివరాల్లోకి వెళితే, 31 ఏళ్ల మహిళ, కానిస్టేబుల్ గా పనిచేస్తుండగా, తొలిసారి, గత సంవత్సరం మార్చిలో ఆమెకు శీతల పానీయంలో మత్తుమందు కలిపి ఇచ్చి అత్యాచారానికి పాల్పడ్డాడు.

ఆ ఘటనను వీడియో తీసి, పలుమార్లు బెదిరించి లొంగదీసుకున్నాడు. కొన్నిసార్లు కొట్టాడు కూడా. సీబీడీ, పాన్వెల్, కామోత్, ఖర్ గర్ ప్రాంతాల్లో ఆమెపై అత్యాచారం చేశాడు. ఈ వీడియోను సామాజిక మాధ్యమాల్లో పెడతానని బెదిరిస్తుండటంతో ఆమె పోలీసులను ఆశ్రయించింది. ఆమె ఫిర్యాదు మేరకు అమిత్ పై ఎస్సీ, ఎస్టీ వేధింపుల చట్టం మేరకు కేసు నమోదు చేశామని చెప్పిన పోలీసులు, విచారణ జరుపుతున్నామని తెలిపారు. 2010లో నిందితుడు, బాధితురాలు ఒకే పోలీసు స్టేషన్ లో విధులు నిర్వహించారని తెలుస్తోంది.